Que as po furmer verbs ...
• cun agiundscher la desinenza dal verb (impustüt las desinenzas -er ed -ir) a nomens u adjectivs.
quint – quinter, chatscha – chatscher, spüda – spüder, scoula – scoler,
lod – luder, sclingia – sclinger, predsch – predscher; spüzza – spüzzir,
sagl – saglir; glüsch – glüschir; stüz/stüzza – stüzzer; sblech – sblachir
• cun agiundscher prefixs a nomens, adjectivs u verbs, p.ex.:
a-: bratsch – abratscher, sagl – assaglir, terra – atterrer; trer – attrer
s-/sch-/s-ch-: tagl – staglier, larg – schlarger, muot – schmutter;
chargia – s-charger; cler – sclarir
in-/im-: tun – intuner, titul – intituler; bel – imbellir, pitschen – impitschnir,
s-chür – ins-chürir; bütter – imbütter
• cun agiundscher suffixs a nomens u ad adjectivs, p.ex.:
-ager: dan – dannager, festa – festager, serp – serpager; net/netta – nettager, zop/zoppa – zoppager
-argner: bütsch – bütschargner
-ificher: persuna – persunificher; simpel/simpla – simplificher,
güst/güsta – güstificher, cler – clarificher
-iser: memoria – memoriser
-uler: vent – sventuler, frod – froduler; crider – criduler
-uiner: saung – sanguiner
• cun agiundscher la desinenza -anter a nomens, adjectivs u verbs per furmer uschenumnos 'verbs factitivs' chi expriman ün 'fer fer' u 'fer dvanter' (vair 2.4.6.d).
rabgia – rabgianter, glüsch – glüschanter
cuntaint – cuntanter, absaint – absanter, grit/gritta – grittanter
taschair – taschanter, zupper – zuppanter
Remarchas:
Tscherts verbs müdan il vocal dal tschep in confrunt cul nomen, p.ex. sot – suter, chaunt – chanter, pesch – pas-cher, sbreg – sbragir, cler – sclarir, uonda – undager
Ils nomens chi glivran cul sun -gl survegnan illa fuorma verbela sün -er auncha ün -i-, p.ex. sbagl – sbaglier, imbruogl – imbruglier, masdügl – masdüglier
