mediomatix - meds da lingua en tschintg idioms

La Professura da rumantsch da la Scola auta da pedagogia dal Grischun ha elavurà per incumbensa dal chantun Grischun in nov med d'instrucziun da lingua analog e digital per la 2. fin 9. classa sco era grammaticas da scola unitaras en tut ils tschintg idioms vallader, puter, sursilvan, sutsilvan, e surmiran. Actualmain vegnan ils meds elavurads en l'idiom surmiran. Ils meds d'instrucziun sco era las grammaticas da scola unitaras èn cumpatibels cun il Plan d'instrucziun 21 ed èn disponibels a moda analoga e digitala.

Ils exercizis digitals cumpletteschan ils meds d'instrucziun. Ils scolars e las scolaras pon lavurar a moda individuala e trenar, automatisar e profundar lur savida grammaticala. Ils exercizis stattan en stretg connex cun la grammatica da scola. En il mument datti exercizis digitals en tut ils idioms per la 2. e 3. classa. Per il surmiran stattan era a disposiziun exercizis per la 4., 5. e 6. classa. Per l'onn da scola 2027/2028 èn planisads per tut ils idioms exercizis per la 4. e 5. classa, per l'onn da scola 2028/2029 exercizis per la 6. e 7. classa e per l'onn da scola 2029/2030 exercizis per la 8. e 9. classa.