L'adöver dal perfet e da l’imperfet

Il perfet vain druvo ...

• per exprimer evenimaints, acziuns e fats chi sun glivros u accumplieus i'l passo.

Andri ho do ün güvel dal plaschair, cur ch'el ho vis sieu velo nouv davaunt chesa.

• per exprimer acziuns concretas chi capitan 'sül palc'.

Tuot in ün dandet ho il chaun bublo ed ils homens sun currieus notiers.

Ün di ho il spiert aviert l'üsch ed es svulo davent.

L'imperfet vain druvo ...

• per exprimer situaziuns e fats chi nu sun auncha glivros u accumplieus.

A d'eira üna bella saira da sted. Il sulagl giaiva plaunet adieu.

• per descriver adüs e repetiziuns i'l passo.

Ella giaiva mincha sanda saira in sortida.

• per descriver 'culissas e scenaris' i'l passo.

Il sulagl cuccaiva aint da fnestra ed a d'eira chod in staunza.

A d'eira fraid e da dalöntsch as udiva la rumur dal flüm.

Aint il chastè vivaiva daspö decennis ün spiertin.

In ün raquint staun l'imperfet ed il perfet in relaziun ün cun l'oter (interacziun traunter ils duos temps). Que as po congualer lur adöver cun que chi capita sün ün palc da teater.

Il leder es fügieu, cur ch'el ho vis cha'l pulizist spettaiva ad el.

Ladina faiva ün cupid, cur cha que ho sclingio tuot in üna vouta vi da la porta d'chesa.