Successiuns da pleds, organisadas an maniera logica e grammaticala, ins nomna construcziuns (er: frasas). I dat treis sorts da construcziuns:
• Construcziuns declarativas (tgi dacleran ensatge u tgi descreivan en fatg).
Luisa cloma igl bab.
• Construcziuns interrogativas (tgi fon ena dumonda).
Cloma Luisa igl bab?
• Construcziuns affectivas (tgi expriman p.ex. en'emoziun u en cumond).
Luisa, cloma igl bab!
Las proposiziuns èn parts d'ena construcziun. Construcziuns consistan dad egna u da ples proposiziuns. Mintga proposiziun cuntigna normalmaintg en verb conjugo.
Ia vign a tgesa. (1 construcziun; 1 proposiziun)
Ia vign a tgesa, perchegl tg'ia stò far igls pensums. (1 construcziun;
2 proposiziuns)
Ia vign a tgesa, fatsch igls mies pensums e tedl musica. (1 construcziun;
3 proposiziuns)
Adatg:
Particips (p.ex. fatg, canto, [el è] ia) ed infinitivs (p.ex. far, cantar, eir) n'èn betg furmas conjugadas digl verb. Ainten ena proposiziun ston els star adegna ansemen cun en verb conjugo.
Remartga:
Dasper las proposiziuns verbalas dattigl er proposiziuns nunverbalas, c.v.d. proposiziuns tgi na cuntignan betg en verb conjugo.
Angraztg. (1 construcziun; 1 proposiziun)
Puspe te! (1 construcziun; 1 proposiziun)
Ea, ia vign a tgesa. (1 construcziun; 2 proposiziuns)
I dat construcziuns simplas e construcziuns cumponeidas.
La proposiziun consista da differentas parts. Chellas parts èn igl subject, igl object (direct ed indirect), igl predicat ed igl adverbial. Tot las parts oter tg'igl predicat son neir accumpagnedas d'en attribut.