Definiziun
Ils adjectivs sun pleds chi expriman, cu cha'l nomen es.
grand, dutsch, lung, bel, verd
Ils numerels tuochan eir tals adjectivs.
Ils adjectivs
L'accord da l'adjectiv
Ils adjectivs sun accumpagneders dals nomens. Els as drizzan tenor la persuna ed il numer dal nomen.
ün cher mat
üna scolara intelligiainta
chotschas ruottas
autos mellans
Il particip preschaint druvo scu adjectiv
Il particip preschaint ho pers sia valur verbela oriunda e vain druvo hozindi be pü scu adjectiv. El s'accorda consequentamaing i'l gener e numer cul nomen. Quists adjectivs vegnan furmos cullas desinenzas -ant (verbs sün -er) ed -aint (verbs sün -'er, -air ed -ir).
il maun tremblant
üna famiglia bainstanta
ova currainta
il mais curraint
preda flurainta
duonnas cuntschaintas
Ils gros da conguel dals adjectivs (la graduaziun)
Culs adjectivs as po congualer las chosas üna cun l'otra. Ils trais gros da conguel dals adjectivs sun il positiv, il cumparativ ed il superlativ.
| positiv | cumparativ | superlativ |
| Il cudesch es stigl. | Il quadern es pü stigl. | Il fögl es il pü stigl. |
| La vschinauncha es granda. | La cited es pü granda. | La metropola es la pü granda. |
| Il mat es pitschen. | Il mattet es pü pitschen. | Il mattin es il pü pitschen. |
| Las leivras sun ligeras. | Las müers sun pü ligeras. | Las furmias sun las pü ligeras. |
Fuormas specielas:
bun, meglder, il meglder / buna, megldra, la megldra
mel, mender, il mender / mela, mendra, la mendra
nosch, pês, il pês / noscha, pêra, la pêra
bger, dapü, il pü bger / bgera, dapü, la pü bgera
poch, damain, il pü poch / pocha, damain, la pü pocha
A's po agiundscher a mincha adjectiv il suffix (la desinenza) -ischem/-ischma per furmer ün superlativ.
cun grandischem plaschair
üna bunischma tschaina
Superlativs paun eir gnir furmos cun las presilbas extra-, super-, multi- ed ultra-.
ün cas extraordinari
üna taila superfina
ün hom multimilliunari
ün teater ultramodern
La pusiziun da l’adjectiv
L'adjectiv po ster davaunt u davous il nomen.
Ün pêr adjectivs (surtuot cuorts) chi expriman ün güdicat u ün'opiniun staun pelpü davaunt il nomen.
ün bel di, bell'ora, trid'ora, buns amihs, Bun di, bun an!
ün bel mat, üna bun'ideja, ün cler mussamaint, ün tuct sentimaint, üna granda chosa
In tscherts cas müdan ils adjectivs lur sen, tuot tenor sch'els staun davaunt u davous il nomen.
|
El es ün grand hom. El es ün hom grand. |
ün hom important ün hom na pitschen |
|
El es ün pover hom. El es ün hom pover. |
ün hom chi svaglia cumpaschiun ün hom chi nun es rich |
|
Eau d'he cumpro ün nouv auto. Eau d'he cumpro ün auto nouv. |
ün oter auto, quel po eir esser vegl ün auto resch nouv e na ün d'occasiun |
Ils seguaints adjectivs staun adüna davous il nomen:
• adjectivs chi indichan üna culur
üna schocha cotschna, ögls verds, il parisol violet
• adjectivs chi indichan üna fuorma
la maisa ovala, il lain queder, üna fnestra arduonda
• adjectivs chi indichan ün gust
ovas dutschas, erva escha, ün aperitiv amar
• adjectivs chi indichan la naziunalited
poets rumauntschs, la lingua francesa, la scrittüra araba
• adjectivs pü lungs
ögls glüschaints, ün viedi interessant, scolars diligiaints, soluziuns intelligiaintas e radschunaivlas
• particips cun la funcziun d'adjectiv
ardöffels brassos, las fluors protettas
Furmer adjectivs
Que as po furmer nouvs adjectivs da nomens, verbs ed oters adjectivs cun agüd da las seguaintas strategias:
- cul particip preschaint (vair 2.3.3.)
- cun suffixs, p.ex.:
-abel(-abla) resp. -ibel/ibla: accepter – acceptabel; chapir – chapibla
-el(a)/il(a): univers – universel / pur – puril
-ais(a): Berna – bernais; chantun – chantunaisa
-aivel(-aivla): amur – amuraivel; aventüra – aventüraivla
-ant(a): alarm – alarmant; bainster – bainstanta
-ic(a)/-atic(a): energia – energic / problem – problematica
-in(a)/-aun(a): alp – alpin / America – americaun
-iv(a): abüs – abüsiv; construct – constructiva
-us(a): s-chima – s-chimus; süj – süjusa
Remarcha:
• Que as po eir intensiver adjectivs existents culs suffixs -et(ta), -in(a),
-ischem(-ischma), -atsch(a)
- cher/chera – cherin/cherina; pitschen – pitschnin/pitschnina
- bel/bella – belischem/bellischma
- bun(a) – bunatsch(a)
Ils numerels
Ils numerels tuochan tals adjectivs, perque ch'els paun accumpagner ün nomen. A do numerels cardinels (numers cardinels) e numerels ordinels (numers ordinels).