Successiuns da pleds, organisedas in maniera logica e grammaticala, as nomna 'frasas'. A do trais sorts da frasas:
• frasas declarativas (chi decleran üna chosa u chi descrivan ün fat)
Luisa clama a sieu bap.
• frasas interrogativas (chi faun üna dumanda)
Clama Luisa al bap?
• frasas affectivas (chi expriman per exaimpel ün'emoziun u ün cumand)
Luisa, clama al bap!
Üna frasa consista da las seguaintas parts:
• proposiziuns
• parts da la proposiziun
Proposiziuns sun parts d'üna frasa. Frasas consistan d'üna u da püssas proposiziuns. Mincha proposiziun cuntegna normelmaing ün verb conjugo.
Eau vegn a chesa. (1 frasa; 1 proposiziun)
El lavura, per cha'l temp passa. (1 frasa; 2 proposiziuns)
Eau vegn a chesa, fatsch mias lezchas e taidl musica. (1 frasa; 3 proposiziuns)
Attenziun:
Particips (p.ex. fat, chanto, ieu) ed infinitivs (p.ex. fer, chanter, ir) nu sun fuormas conjughedas dal verb. In üna proposiziun staun els adüna ster insembel cun ün verb conjugo.
Remarcha:
Sper las proposiziuns verbelas do que eir proposiziuns na verbelas, que voul dir proposiziuns chi nu cuntegnan üngün verb conjugo.
Grazcha. (1 frasa; 1 proposiziun)
Attenziun! (1 frasa; 1 proposiziun)
Schi, eau vegn a chesa. (1 frasa; 2 proposiziuns)
La proposiziun consista da differentas parts cha's nomna 'parts da la proposiziun'. Quellas parts sun il subject, l'object (direct ed indirect), il predicat e l'adverbiel. Tuot las parts, cun excepziun dal predicat, paun gnir accumpagnedas d'ün attribut.