La frasa cumposta

Üna frasa chi consista da duos u da püssas proposiziuns as nomna üna 'frasa cumposta'.

Linard cuorra intuorn il bös-ch, clappa la balla e surria.

Romana es turneda a chesa, cur cha que ho cumanzo a plouver.

Las proposiziuns d'üna frasa cumposta chi paun furmer ün'egna frasa as nomna 'proposiziuns principelas'.

Tü hest radschun, el es già partieu.

Vezzast a l'hom, el vain güst giò da la via.

Las proposiziuns chi dependan dad ün'otra proposiziun e nu paun ster sulettas as nomna 'proposiziuns subordinedas'.

Eau vegn a chesa, perche ch'eau sun staungel.

Ella ho dit ch'ella vegna damaun.

Hest vis l'auto ch'el ho cumpro?

Üna frasa chi consista da duos u da püssas proposiziuns principelas as nomna 'frasa coordineda'.

Eau al d'he dumando ün cussagl, ma el nun ho respundieu.

Spetta ed hegiast pazienzcha! 

Üna frasa chi consista almain d'üna proposiziun principela e d'üna proposiziun subordineda vain numneda 'frasa structureda'.

Eau vegn a chesa, perche ch'eau d'he auncha da lavurer.

La scolara chi vaiva her auncha feivra es hoz darcho sauna.