Definiziun
Ils adjectivs ein plaids ch'expriman co il nomen ei.
grond, dultsch, liung, bi, verd
Ils numerals s'audan era tiels adjectivs.
Ils adjectivs
Igl accord digl adjectiv
Ils adjectivs ein accumpignaders dils nomens. Els s'accordeschan cul nomen arisguard genus (masculin ni feminin) e numerus (singular ni plural).
in car buob
ina scolara intelligenta
caultschas ruttas
ils autos mellens
Il particip present duvraus sco adjectiv
Il particip present ha piars sia valur verbala oriunda e vegn duvraus mo pli sco adjectiv. El s'accorda consequentamein en genus e numerus cul nomen. Quei adjectiv vegn formaus culla finiziun -ont (verbs sin -ar), -ent (verbs sin -er ed -ir).
il maun tremblont
ina famiglia beinstonta
pradas flurentas
bucca rienta
dunnas enconuschentas
Ils grads da cumparegliaziun dils adjectivs
Culs adjectivs san ins cumparegliar las caussas ina cun l'autra. Ils treis grads da cumparegliaziun (era: gradaziun) dils adjectivs ein il positiv, il cumparativ ed il superlativ.
| positiv | cumparativ | superlativ |
| Il cudisch ei satels. | Il carnet ei pli satels. | Il fegl ei il pli satel. |
| La vischnaunca ei gronda. |
Il marcau ei pli gronds. |
La metropola ei la pli gronda. |
| Il mat ei pigns. |
Il mattet ei pli pigns. |
Il mattin ei il pli pign. |
| Las lieurs ein levas. |
Las miurs ein pli levas. |
Las furmiclas ein las pli levas. |
Fuormas specialas:
|
bien buna |
meglier megliera |
il meglier la megliera |
(fuorma regulara: bien, pli bien, il pli bien / buna, pli buna, la pli buna)
|
mal (schliet) mala (schliata) |
mender mendra |
il mender la mendra |
(fuorma regulara: schiet, pli schliet, il pli schliet / schliata, pli schliata, la pli schliata)
|
mal mala |
pir pira |
il pir la pira |
Remarcas:
• Ins drova las suandontas particlas da cumparegliaziun:
schi/aschi ... sco (egual): El ei aschi gronds sco ti.
pli ... che (buc egual): Ella ei pli gronda che ti.
meins ... che (buc egual): Ella ei meins gronda che ti.
• Ei dat ulteriuras modas da formar il superlativ:
Cun aschuntar a mintga adjectiv il suffix -issim/-issima per formar in superlativ. Quella fuorma vegn surtut duvrada el lungatg elevau.
mia carissima mumma
in sontgissim propiest
Culs prefixs: extra-, super-, sur-, multi-, ultra-.
in cass extraordinari
ina teila superfina
ina spertadad surfatga
in teater ultramodern
Igl adjectiv predicativ ed igl adjectiv attributiv
Ei dat adjectivs predicativs ed adjectivs attributivs.
Igl adjectiv predicativ ei unius cul nomen entras in verb ed ei vegn aschuntau in -s alla fin digl adjectiv. Quel numnan ins -s predicativ. El vegn aschuntaus mo agl adjectiv masculin singular.
Quei auto ei blaus.
Il cudisch ei buns.
Igl adjectiv attributiv ei unius directamein cul nomen e sto s'accordar cun quel en genus e numerus.
Jeu hai cumprau in auto blau.
Jeu hai legiu in bien cudisch.
Ils numerals
Ils numerals s'audan tier ils adjectivs, perquei ch'els san accumpignar in nomen. Ins differenziescha ils numerals cardinals (diembers cardinals) ed ils numerals ordinals (diembers ordinals).