2.11 A tgatscha da puncts, segns da dumonda e dad exclamaziun.

Ena construcziun è scu ena pitschna istorgia. L'antschatta dad ena construcziun scrivagn nous adegna cun en bustab grond. Alla fegn d'ena construcziun faschagn nous adegna en segn d'interpuncziun.

I dat treis differentas sorts da construcziuns:

Construcziuns declarativas

Construcziuns tgi rachintan u dacleran ensatge. Alla fegn da chellas construcziuns mattagn nous en punct.

Exaimpel: Sandro screiva en'istorgia da dragungs.

Construcziuns interrogativas

Construcziuns tgi dumondan ensatge. Alla fegn da chellas construcziuns mattagn nous en segn da dumonda.

Exaimpel: Vignst cun me a sa nudar?

Construcziuns affectivas

Construcziuns tgi cuntignan en cumond u en'exclamaziun. Alla fegn da chellas construcziuns mattagn nous en segn d'exclamaziun.

Exaimpel: Aua! Te am fast mal!

Tedla igl audio e decida tge segn d’interpuncziun tgi dovra tar las suandontas construcziuns.