L'alfabet

Il ladin resguarda tuot ils 26 segns/custabs da l'alfabet.

a, b, c, d, e, f, g, h, i, j, k, l, m, n, o, p, q, r, s, t, u, v, w, x, y, z

Il ladin ha set vocals.

a, e, i, o, ö, u, ü

Duos vocals ün davo tschel, chi fuorman ün'unica silba, as nomna ün 'diftong'. Ils diftons ils plü importants in vallader sun:

ai (bain), au (auto), ei (meis, eivna), eu (cheu, euro), ia (viadi), ie (viers), io (giodair), iö (aviöl), iu (regiun), ou (scoula), ua (scua), ue (guerra), uo (tuor, uorden), üe (üert, büergia), ui (guis, quist)

Trais vocals ün davo tschel chi fuorman ün'unica silba as nomna ün 'triftong'. Ils triftongs il plü importants in vallader sun:

aua (aual), eua (leua), iai (cliaint), iau (miau), ieu (gnieu), iou (figlioul), jou (jousla), iuo (giuotta), uai (seguaint), uei (uei), uoi (Cuoira)

Il ladin ha 21 consonants.

b, c, d, f, g, h, j, k, l, m, n, p, q, r, s, t, v, w, x, y, z

Remarcha:

Il 'j' (i lung) vain considerà sco mez vocal. Pelplü vain el trattà sco consonant.

In vallader daja divers segns e suns specials. Els vegnan scrits cun plüs custabs (duos, trais o perfin quatter).

ch (chasa), dsch (dschember), sch (schner), s-ch (s-chala), tsch (tschiervi), gl (glüna), gn (muntogna), gi (gita), ge (gener), gö (gövgia), gü (gün), ghe (ghetto), ghi (ghigna), gui (guitarra), ci (citrun), ce (producent), che (chemia), qu (quatter)

Remarcha: 

Ils suns ch e tsch vegnan suvent sbarattats. Il ch es plü dür e vain pronunzchà bod sco il c talian in cento e cinquanta. Il tsch invezza es plü lom e vain pronunzchà sumgliaint al tsch tudais-ch.

I's scriva p.ex.: las chotschas, il tschütschapuolvra, la tschücha, la chasa, il chatschader, tschinchtschient, chi chi tschercha chatta