L’adöver dal perfet e da l'imperfet

Il perfet vain dovrà ...

• per exprimer evenimaints, acziuns e fats chi sun terminats i'l passà.

Andri ha dat ün güvel dal plaschair, cur ch'el ha vis seis velo nouv davant chasa.

• per exprimer acziuns concretas chi capitan 'sül palc'.

Tuot in ün dandet ha il chan bublà e'ls homens sun currüts nanpro.

Ün di ha il spiert drivi l'üsch ed es svolà davent.

L'imperfet vain dovrà ...

• per exprimer situaziuns e fats chi nu sun amo terminats i'l passà.

I d'eira üna bella saira da stà. Il sulai giaiva planet adieu.

• per descriver adüs e repetiziuns i'l passà.

Ella giaiva regularmaing a cuorrer.

• per descriver 'culissas o scenarias' i'l passà.

Il sulai cuccaiva aint da fanestra ed i d'eira chod in stanza.

I d'eira fraid e da dalöntsch as dudiva la rumur dal flüm.

Aint il chastè vivaiva daspö decennis ün pitschen spiert.

In ün raquint stan l'imperfet e'l perfet in relaziun ün cun l'oter (interacziun tanter ils duos temps). I's po congualar lur adöver cun quai chi capita sün ün palc da teater.

Il lader es mütschi, cur ch'el ha vis cha'l polizist til spettaiva.

Ladina faiva ün cupid, cur chi ha sclingi tuot in ün dandet vi da la porta chasa.