Ils pronoms persunals objects
Ils pronoms persunals objects (accentuats e na accentuats) indichan la persuna o la chosa, a la quala l'acziun dal subject as drizza. Ils pronoms objects accentuats (mai, tai ...) vegnan accumpagnats da la preposiziun a.
pronoms objects accentuats
|
mai |
El cloma a mai. |
|
tai |
Nus güdain a tai. |
|
el |
Vus salüdais ad el. |
|
ella |
Vus salüdais ad ella. |
|
nus |
Els vezzan a nus. |
|
vus |
Nus clomain a vus. |
|
els |
Eu pens ad els. |
|
ellas |
Eu pens ad ellas. |
Remarcha:
Ils pronoms objects accentuats vegnan dovrats eir cun otras preposiziuns, p.ex.:
Quist regal es per tai. / El vain cun nus. / Els vegnan pro mai.
La posiziun dals pronoms objects na accentuats
Il pronom object na accentuà sta davant il verb conjugà.
Eu til clom a las ses. Nus tilla vezzain daman.
Eu til n'ha clomà a las ses. Nus tilla vain vissa her.
Eir in cumbinaziun cun verbs modals (laschar, far, pudair, stuvair, vulair/lair) sta il pronom object na accentuà davant il verb conjugà.
Eu at lasch uossa ir. / Eu't giavüsch tuot il bön.
El ans fa far lezchas.
El am voul güdar.
Nus tillas stuvain portar.
Ils pronoms objects na accentuats illa frasa negativa
Il pronom object na accentuà sta tanter la particla da negaziun nu e'l verb conjugà.
Eu nu til clom per nom.
Nus nu tilla vezzain daman.
Ils pronoms objects na accentuats illa frasa imperativa
Illa frasa imperativa affirmativa vain miss il pronom object na accentuà üsitadamaing davant il verb conjugà. Las fuormas dal pronom object na accentuà sun las seguaintas:
| pronom object | 2. persuna singular | 2. persuna plural |
| am | Am scriva ün sms! | Am scrivai ün sms! |
| til | Til scriva ün sms! | Til scrivai ün sms! |
| tilla | Tilla scriva ün sms! | Tilla scrivai ün sms! |
| ans | Ans scriva ün sms! | Ans scrivai ün sms! |
| tils | Tils scriva ün sms! | Tils scrivai ün sms! |
| tillas | Tillas scriva ün sms! | Tillas scrivai ün sms! |
Il pronom object na accentuà po però eir star davo il verb conjugà. Las fuormas dal pronom object sun in quist cas las seguaintas:
| davo consonant | exaimpel | davo vocal | exaimpel |
| am | Dit am la vardà! | 'm | Di'm la vardà! |
| al | Dit al la vardà! | 'l | Di'l la vardà! |
| la | Dit la la vardà! | la | Di la la vardà! |
| ans | Dit ans la vardà! | 'ns | Di'ns la vardà! |
| als | Dit als la vardà! | 'ls | Di'ls la vardà! |
| las | Dit las la vardà! | las | Di las la vardà! |
Remarcha:
Schi's tratta da la tschinchavla persuna da l'imperativ affirmativ, fuormà cul pronom object na accentuà davo ün verb regular in -ar, -air o -er, dvainta la desinenza -ai dal verb a l'imperativ ün -à.
| verbs in -ar: güdar
> am güdai, e.u.i. |
verbs in -air: tgnair > am tgnai, e.u.i. |
verbs in -er: scriver > am scrivai, e.u.i. |
| Güdà'm! |
Tegnà'm clos! |
Scrivà'm ün sms! |
| Güdà'l! |
Tegnà'l clos! |
Scrivà'l ün sms! |
| Güdà la! |
Tegnà la clos! |
Scrivà la ün sms! |
| Güdà'ns! |
Tegnà'ns clos! |
Scrivà'ns ün sms! |
| Güdà'ls! |
Tegnà'ls clos! |
Scrivà'ls ün sms! |
| Güdà las! |
Tegnà las clos! |
Scrivà las ün sms! |
Illa frasa imperativa negativa vain miss il pronom object na accentuà davant l'infinitiv o il verb conjugà. Las fuormas dal pronom object sun las seguaintas:
| pronoms objects | 2. persuna singular | 2. persuna plural |
| 'm | Nu'm scriver! | Nu'm scrivarai! |
| til/'l | Nu til/Nu'l scriver! | Nu til/Nu'l scrivarai! |
| tilla/la | Nu tilla/la scriver! | Nu tilla/la scrivarai! |
| 'ns | Nu'ns scriver! | Nu'ns scrivarai! |
| tils/'ls | Nu tils/Nu'ls scriver! | Nu tils/Nu'ls scrivarai! |
| tillas/las! | Nu tillas/las scriver! | Nu tillas/las scrivarai! |