Nomens fuormats cun suffixs
Tschertas desinenzas chi's po agiundscher ad ün pled per crear oters pleds da la listessa famiglia as nomna 'suffixs'.
I's po distinguer tanter oter ils seguaints suffixs:
• suffixs diminutivs chi fan la chosa plü pitschna: -et/-etta, -in/-ina
il cudaschet, la strietta, il mattin, la cullina, Gianin, Annina
• suffixs augmantativs chi fan la chosa plü gronda o plü intensiva: -un/-una,
-atsch/-atscha, -aglia, -üra, -üm
l'homun, la stüvuna, ll mattatsch, la nüvlatscha, la fradaglia, la chavlüra, la
s-chürdüm
• suffixs pegiorativs chi fan la chosa plü noscha o plü negativa: -atsch/-atscha,
-öz
il ventatsch, il pledatsch, la femnatscha, il baderlöz
• suffixs collectivs chi expriman ün nomer na determinà: -aglia, -iglia, -mainta,
-om
la magistraglia, la vermiglia, la pastriglia, la fierramainta, la narramainta, l'utschlamainta, il fögliom, il muos-chom, il nüvlom, il palperom, il femnom
Eir davo quists pleds collectivs sta il verb adüna al singular.
La magistraglia fa ün viadi.
Quista vermiglia es s-chiffusa.