Nomens cumposts e lur fuormas dal plural
Ils nomens cumposts vegnan scrits seguaintamaing:
1) Pleds dal tip nomen + nomen vegnan pelplü colliats culla preposiziun da (d' davant ün vocal o ün h- na pronunzchà), e be il prüm pled vain miss al plural.
la fluor da sulai, las fluors da sulai
il mantel da plövgia, ils mantels da plövgia
la taila d'arogn, las tailas d'arogn
la tuorta da nusch, las tuortas da nusch
la chombra d'hotel, las chombras d'hotel
2) Pro tscherts pleds dal tip nomen + nomen es la preposiziun da gnüda redotta ad ün d' (eir davant ün consonant) o perfin supprimida. Eir pro quists pleds vain be il prüm pled miss al plural.
la foura d'nas, las fouras d'nas
la barba d'boc, las barbas d'boc
la pel d'giallina, las pels d'giallina
la chomma d'lain, las chommas d'lain
la cua d'giat, las cuas d'giat
la porta chasa, las portas chasa
la clav chasa, las clavs chasa
il pled clav, ils pleds clav
il toc charn, ils tocs charn
il magöl aua, ils magöls aua (ma: il magöl d'aua = magöl per baiver aua)
l'utschè mezmür, ils utschels mezmür
Cas specials:
l'utschè cuader, ils utschels cuaders
il chan taschin, ils chans taschins (chan da bescher)
3) Tscherts nomens cumposts vegnan scrits insembel, e'l -s dal plural vain agiunt a la fin dal pled.
il filfier, ils filfiers
la nuschpigna, las nuschpignas
il suordmüt, ils suordmüts
il maisterfalegnam, ils maisterfalegnams
Excepziuns:
la ballapè, las ballaspè (ballas per giovar a ballapè)
la viafier, las viasfier (vias da fier)
4) Minchatant as collia ün nomen + nomen eir cun ün'otra preposiziun (a, cun, in). Eir pro quists pleds vain be il prüm nomen miss al plural.
la barcha a vela, las barchas a vela
il pan cun paira, ils pans cun paira
l'arch in tschêl, ils archs in tschêl
5) Cumbinaziuns da verb + nomen vegnan scrittas insembel, e'l -s dal plural vain agiunt a la fin dal pled.
il portatun, ils portatuns
il battasenda, ils battasendas
il parasur, ils parasurs
il valanöglia, ils valanöglias
il taglialaina, ils taglialainas