La frasa cumposta

Üna frasa chi consista da duos o da plüssas proposiziuns as nomna üna 'frasa cumposta'.

Linard cuorra intuorn il bös-ch, tschüffa la balla e ria.

Romana es ida a chasa, cur chi ha cumanzà a plouver.

Las proposiziuns d'üna frasa cumposta chi pon fuormar ün'aigna frasa as nomna 'proposiziuns principalas'.

Tü hast radschun, el es fingià parti.

Gnit a chasa, id es fingià s-chür.

Las proposiziuns chi dependan d'üna otra proposiziun e chi nu pon star sulettas as nomna 'proposiziuns subordinadas'.

Eu vegn in let, perquai ch'eu sun stanguel/stangla.

Ella ha scrit ch'ella nu possa gnir.

Hast vis l'auto ch'el ha cumprà?

Üna frasa chi consista da duos o da plüssas proposiziuns principalas as nomna 'frasa coordinada'.

Eu til n'ha dumandà ün cussagl, ma el nun ha respus.

Spetta ed hajast pazienza! 

Üna frasa chi consista almain d'üna proposiziun principala e d'üna proposiziun subordinada as nomna 'frasa structurada'.

Eu vegn a chasa, perche ch'eu n'ha amo da lavurar.

La scolara, chi vaiva her amo feivra, es hoz darcheu sana.