Il conjunctiv

Il conjunctiv exprima en general in giavisch, ina voluntad, ina speronza ni ina supposiziun. El vegn duvraus en emprema lingia en proposiziuns subordinadas ed ei dependents dil verb dalla proposiziun principala ni dad auters plaids che precedan.

Jeu vi che ti vegnies a casa dallas endisch.

Ella spera che quei seigi en uorden.

Nus supponin ch'ella ditgi la verdad. 

 

Il conjunctiv vegn era duvraus el discuors indirect.  

Ivo ha detg ch'el temi il tgaun dils vischins.

 

Plinavon vegn il conjunctiv duvraus ...

• suenter certas conjuncziuns, p.ex. senza che, avon che, per che.

El ei ius naven, senza che jeu sappi. 

Gida tiu frar, per ch'el seigi ad uras. 

• en proposiziuns principalas cun ni senza la conjuncziun che.

Hagies pazienzia. 

 

Tipic per las fuormas dil conjunctiv ei ch'ellas cuntegnan en tut las persunas

in -i. Las finiziuns ein identicas en tuttas quater conjugaziuns: -i, -ies, -i, -ien, 

-ies, -ien.

-i (gidi, temi, vendi, senti)

-ies (gidies, temies, vendies, senties)

-ien (gidien, temien, vendien, sentien)

-ies (gidies, temies, vendies, senties)

-ien (gidien, temien, vendien, sentien)

 

Per l'emprema e la secunda persuna dil plural dat ei denton adina duas fuormas pusseivlas:

 

• ina fuorma tradiziunala che sedrezza tenor las finiziuns dall'emprema e secunda persuna plural digl indicativ present:

nus cantein – che nus canteien

nus temein – che nus temeien

vus vendeis – che vus vendeies

vus sentis – che vus sentîes        

 

• ina fuorma simplificada che vegn cunzun duvrada el lungatg plidau e pli e pli fetg era el lungatg scret:

nus cantein – che nus contien

nus temin – che nus temien

vus vendis – che vus vendies

vus sentis – che vus senties   

 

Adatg:

Sch'in verb ha duas fuormas ell'emprema e secunda persuna plural digl indicativ present, dat ei ell'emprema e secunda persuna plural dil conjunctiv schizun treis fuormas.

nus temein/temin – che nus temeien/temîen/temien

vus temeis/temis – che vus temeies/temîes/temies

 

Renviament:

In verb da mintga conjugaziun en tut ils temps e modus sesanfla alla fin dil capetel 'Ils verbs'.