Il pronom demonstrativ sez
Il pronom demonstrativ sez sedistingua en siu diever dils auters pronoms demonstrativs. El stat normalmein suenter in pronom persunal per rinforzar il plaid che preceda. Il pronom demonstrativ sez ei variabels tenor persuna, genus e numerus. Las fuormas ein las medemas suenter il pronom persunal subject sco suenter il pronom persunal object.
Las fuormas dil pronom demonstrativ sez ein las suandontas:
pronom persunal subject:
| persuna | sg. masc. | sg. fem. |
| 1. pers. sg. | jeu mez | jeu mezza |
| 2. pers. sg. | ti tez | ti tezza |
| 3. pers. sg. | el sez | ella sezza |
| 1. pers. pl. | nus sezs | nus sezzas |
| 2. pers. pl. | vus sezs | vus sezzas |
| 3. pers. pl. | els sezs | ellas sezzas |
Ella sezza hai jeu buca viu.
Jeu sai che ti tez has mai detg quei, denton tias soras.
pronom persunal object:
| persuna | sg. masc. | sg. fem. |
| 1. pers. sg. | mei mez (a mi mez) | mei mezza (a mi mezza) |
| 2. pers. sg. | tei tez (a ti tez) | tei tezza (a ti tezza) |
| 3. pers. sg. | el sez (ad el sez) | ella sezza (ad ella sezza) |
| 1. pers. pl. | nus sezs (a nus sezs) | nus sezzas (a nus sezzas) |
| 2. pers. pl. | vus sezs (a vus sezs) | vus sezzas (a vus sezzas) |
| 3. pers. pl. | els sezs (ad els sezs) | ellas sezzas (ad ellas sezzas) |
Nus sezs ha el buca viu, denton nies auto.
Jeu dun quei a ti tez.
Remarca:
Sch'il pronom persunal object sereferescha al subject, setracta ei d'ina relaziun reflexiva. En quei cass drovan ins las suandontas fuormas rinforzadas.
| memez (memezza) | nusezs (nusezzas) | nusezzi |
| tetez (tetezza) | vusezs (vusezzas) | vusezzi |
| sesez (sesezza) | sesezs (sesezzas) |
Tegn quei per tetez.
Cun sesezs ein els buca schi rigurus.