Igl object (direct ed indirect)

Il predicat sa vegnir accumpignaus dad objects. Ei dat dus differents objects, tut tenor la moda e maniera co els ein colligiai cul predicat: igl object direct ed igl object indirect.

Igl object (ni cumplement) direct vegn numnaus aschia, perquei ch'el vegn colligiaus directamein cul predicat (senza preposiziun).

Giulian arva la finiastra.

Franca raquenta ina praula.

Igl object (ni cumplement) indirect indichescha la persuna ni la caussa, alla quala l'acziun dil subject sedrezza. El vegn introducius d'in verb e seligia indirectamein cun agid d'ina preposiziun vid il verb. Perquei vegn igl object indirect era numnaus object preposiziunal.

Livia ha dau la bancnota al camerier. (dar enzatgei ad enzatgi)

Il tat seregorda bein da quei temps. (seregurdar dad enzatgei)

Mattiu s'interessescha mo per ballapei. (s'interessar per enzatgei)