Igls segns d’interpuncziun aint igl discurs direct

Igl discurs direct è en elemaint digl text tgi exprima pled per pled chegl tgi vign detg. Ins marchescha igl discurs direct cun virgulettas doblas (varda soura).

 

I dat treis sorts da discurs directs:

 

1. Igl discurs direct tgi stat siva la construcziun accumpagnonta.

El dei: «Ia va fom.»

Igl bab cloma: «Ni!»

Daniel dumonda: «Scu ast nom?»

 

2. Igl discurs direct tgi stat davant la construcziun accumpagnonta.

«Chegl è andretg», rasponda la scolasta.

«Vo a letg!», cumonda la mamma.

«Tge fast?», vot Marc saveir. 

 

3. Igl discurs direct tgi vign interrot dalla construcziun accumpagnonta.

«Claudia», dei Reto, «ò gugent pizza.»

«Na», cloma ella, «ia reiv betg!»

«Livio», dumonda ella, «noua vast?»