Igl particip perfect

Igl particip perfect vign duvro ansemen cugls verbs auxiliars per furmar igls taimps cumponias (perfect, plusquamperfect, futur II).

Ia va luvro. (perfect)

El era gio partia. (plusquamperfect)

Ia varo gio maglea. (futur II)

Ellas saron stadas stanclas. (futur II)

Igls verbs cun la finiziun -ar furman igl particip cun -o/-ada, igls verbs cun la finiziun -er (accentuo) cun la finiziun -ea /-eda. Tot igls oters verbs furman igl particip cun -ia/-eida. Igl particip conjugo cun aveir resta normalmaintg invariabel. Igl particip perfect conjugo cun esser u neir vign accordo (varda er 2.4.11.b).

tgavar – tgavo

paer – paea

vender – vandia

tameir – tamia

durmeir – durmia

spitgier – spitgia

Ellas on tamia, cura tg'igl ò tgamagea.

Igls panets vignan produtgias cun pantg frestg.

Remartga:     

Enqualtgi verb ò en particip perfect irregular, scu p.ex.:

esser – sto

aveir – gia

far – fatg

metter – mess

ancleir – ancletg

cuvreir – cuvert

Ulteriours varda glista da verbs alla fegn digl tgapetel u las Normas Surmiranas, nr. 337s.