Nomens cumponias
Nomens cumponias vignan furmos suandontamaintg:
• nomen + nomen
Pleds cumponias digl tip nomen + nomen, tgi expriman en'appartignientscha (pigl solit ena part digl antier), vignan scretgs cun en stretg da liaziun. Ins metta angal igl amprem nomen aint igl plural.
igl isch-tgesa, igls ischs-tgesa
la clav-tgesa, las clavs-tgesa
la porta-clavo, las portas-clavo
la flour-suglegl, las flours-suglegl
igl pled-clav, igls pleds-clav
la palma-mang, las palmas-mang
la balla-mang, las ballas-mang (balla); ma: igl ballamang (gi, nign plural)
Schi la cumposiziun vign scretga ansemen, survign igl sagond nomen igl -s plural:
igl schefredactour, igls schefredactours
l'autostrada, las autostradas
la nuschpegna, las nuschpegnas
Excepziuns: igls/las guardiabogn, igls/las guardiatgatscha
• nomen + preposiziun/conjuncziun + nomen
Magari colleia er ena preposiziun u ena conjuncziun dus nomens. Chellas cumbinaziuns vignan scretgas ansemen, sch'igl -s digl plural cumpara alla fegn (analog alla regla nomen + adjectiv).
igl feildarom, igls feildaroms
igl pangalatg, igls pangalatgs
la tgadafi, las tgadafis
la veiadafier, las veiadafiers
Remartga:
Pigl solit restan igls pleds zavros an rumantsch (p.ex. igl(s) faziel(s) da nas, igl(s) artg(s) an tschiel, igl(s) pang(s) cun peira, la(s) bartga(s) a vel).
• verb + nomen
Chellas cumposiziuns vignan scretgas ansemen. Er cò vign agiunto igl -s digl plural alla fegn digl pled:
igl portatung, igls portatungs
igl petgalenn, igls petgalenns
igl battasenda, igls battasendas
Adatg: igl dervabeschlas, igls dervabeschlas
• nomen + adjectiv/adjectiv + nomen
Cumposiziuns da chel tip vignan scretgas ansemen, sch'igl -s plural cumpara angal tigl sagond pled.
igl malfatg, igls malfatgs
la mesanotg, las mesanotgs (allas 24.00 h), ma: la mesa notg, las mesas notgs (angal la mesadad d'ena notg)
• ulteriouras cumposiziuns
I dat er nomens tgi èn cumponias sulettamaintg dad otras speztgas da pleds. Chels vignan scretgs ansemen.
igl magliabagn, igls magliabagns
igl malesser, igls malessers
igl valanavot, igls valanavots