La comma
In rumauntsch – scu eir in otras linguas neolatinas – nu sun las reglas da comma uschè strictas scu p.ex. in tudas-ch.
La comma as metta ...
• in frasas chi cuntegnan ün'enumeraziun (püs pleds da simila significaziun), scha'ls singuls pleds nu vegnan collios cun e/ed ed u.
Il dschember, il larsch, il pin ed il tev sun ils quatter bös-chs tipics da noss gods.
Els haun mangio, chanto e suto tuotta saira.
Eau vegn hoz, damaun u puschmaun tar te.
• in frasas chi consistan da püssas parts (frasas coordinedas), scha quellas nu vegnan colliedas cun e/ed u u.
Il bap telefona, la mamma legia ün cudesch, ils iffaunts faun gös/giouvan.
Linard suna la ghitarra, Nina chaunta e tuot la classa taidla.
• in frasas chi consistan da püssas parts (frasas structuredas), scha quellas vegnan colliedas cun conjuncziuns, scu ma, scha, perque, percunter; aunz cha, aunz cu, cu cha, cur cha, cumbain cha, inua cha, perche cha, perque cha,
per cha, uschè cha, etc.
Nus vains vulieu güder, ma el nun ho accepto nos agüd.
Milena clappa noscha glüna, sch'ella ho fam.
Ella nun es gnida a scoula, perche ch'ella d'eira amaleda.
Nus giains in let, cur cha'd es s-chür.
Sest tü, inua ch'ella sto?
Üna comma vain eir druveda ...
• i'l discuors direct per separer il discuors da la proposiziun explicativa.
«Berna es la chapitela da la Svizra», explicha la magistra.
«Sus-chains nus ir a posa?», dumandan ils scolars.
«Evra la fnestra!», disch la mamma.
• in proposiziuns relativas cul pronom il quêl, la quela cumbino cun üna preposiziun.
T'algordast tü da la duonna, cun la quela eau vaiva suto a la festa da god?
• per separer proposiziuns interchaledas u apposiziuns (attributs descriptivs) da la proposiziun principela.
Il delinquent, ün hom da var 40 ans, es gnieu arresto.
Gino Clavuot, il rapper engiadinais, as nomna Snook.
• per separer allocuziuns (per drizzer il pled a qualchün) ed interjecziuns.
Andrea, taidla üna vouta!
Juhui, damaun vains nus liber!
• scha's voul metter ün pled u püs pleds in üna pusiziun speciela per ils fer resortir.
Durmir, que savessi adüna!
Musica e sot, que sun mias grandas paschiuns.
Remarcha:
• A nu vain miss üngüna comma illa frasa structureda cun cha ed aunz la proposiziun relativa culs pronoms chi e cha, oter cu scha's tratta da proposiziuns interchaledas explicativas.
Sest tü cha Ramona discuorra eir rumauntsch?
Rico ho ün frer chi giouva a hockey.
Es que la duonna cha tü hest vis her?
La magistra dal s-chelin ot, chi ho cumanzo d'incuort a der scoula, pera dad esser simpatica.
• Ed eir aunz ils pronoms interrogativs chi chi, chi cha, che chi e che cha in dumandas indirectas nu's metta üngüna comma.
Eau nu se auncha chi chi vain damaun.
Nus vains ans dumandos che cha que voul dir.
• Scha la proposiziun subordineda preceda la principela, as metta üna comma.
Cha'l Grischun es l'unic chantun triling, es cuntschaint.