Il plural collectiv
Ün pêr nomens haun, sper la fuorma dal plural cun -s, üna fuorma dal plural culla desinenza -a. Quella fuorma as nomna il 'plural collectiv'. Ils pleds cun quella desinenza expriman üna quantited na determineda (na definida). Que voul dir cha nu's cugnuoscha il numer exact.
Tü suos-chast piglier duos pairs.
Mamma ho fat ün paun cun paira. (plural collectiv)
Oters plurals collectivs regulers:
il bratsch – la bratscha
il gnierv – la gnierva
il lain – la laina
il spelm – la spelma
Plurals collectivs cun müdedas ortograficas:
il bögl – la böglia
il bös-ch – la bos-cha
l'öss – l'ossa
il ram – la ramma
il crap – la crappa
il grip – la grippa
il früt – la frütta
il piz – la pizza
Otras fuormas collectivas vegnan trattedas i'l chapitel 'Ils suffixs'.
Zieva il plural collectiv sto il verb al singular.
La frütta es madüra.
La ramma es secha.
La föglia ho pers sia culur.
La bos-cha schuschura aint il vent.
La pizza glüscha aint il sulagl da la saira.
Remarcha:
Ün pêr nomens, scu p.ex. la glieud, la chindlamainta, il bagagl, haun be üna fuorma al singular, eir sch'els cumpiglian püssas persunas. Perque sto eir zieva quels pleds il verb al singular.
La glieud es cuntainta.
La chindlamainta fo canera.
Il bagagl paisa memma bger.