A1.29 Blau cler e cotschen rösa

Legia il text e respuonda a las dumondas. Che constataziuns sun güstas, chenünas fosas? 

Il rai Richard il dudeschavel nu d'eira be ün regent scort e güst, ma eir ün pittur renomnà. Siond ch'el vaiva jent a seis pövel, pitturaiva el in prüma lingia ad umans. Per far quai dovraiva el be las culurs nair ed alb. El savaiva bainschi cha la glieud nu d'eira be nair'ed alba, il fascinant per el d'eira da masdar quellas duos culurs. Uschè faiva el bels purtrets in tuns grischs chi derasaivan ün'atmosfera calma e da sgürezza illas stanzas da seis chastè. Il rai d'eira tuottafat cuntaint cun sai svess e cun sia ouvra. 

Ün bel di però ha il rai ris-chà da dar ün'ögliada sur ils cunfins da seis reginom oura e s'ha inamurà illa princessa Liliana. Eir ella d'eira üna pittura famusa paschiunada. Seis purtrets as disferenzchaivan però fich da quels dal rai. Ella dovraiva be culurs fermas e sgiagliadas per sias ouvras. Nair ed alb, las culurs predilettas dal rai, mancaivan illa paletta da culurs da la princessa, ils purtrets dad ella plaschaivan però listess al rai. Eir la princessa d'eira fascinada da las ouvras dal rai, uschè ch'els han decis da s-chaffir ün purtret cumünaivel. Ma cul purtret nun haja dat nöglia da nouv, perquai cha la princessa daiva culur a la vart schnestra da la taila, intant cha'l rai creaiva la part dretta in alb e nair. 

Ün on plü tard han la princessa e'l rai surgni üna figlia. L'uffant vaiva plaschair d'observar a seis genituors a pitturar. Ün di ch'els d'eiran our d'chasa, ha l'uffant tut la culur alba da la paletta da seis bap ed ha culuri cun quella la vart dal purtret cha sia mamma vaiva güsta fini. E mera! Our da las fermas culurs cotschnas, blauas e verdas haja dat nouvas culurs verd cleras, rösas e blau cleras. Cur cha'ls genituors han vis quai, sun els stats inchantats da quels tuns da pastel ed han realisà ch'els staran crear in avegnir ün purtret cumünaivel in quel möd. Cul temp han las culurs blau cleras e rösa perfin s-chatschà las culurs fermas cha la princessa dovraiva il prüm. 

S'inclegia ch'els nun han pudü evitar lingias tortas in lur purtret. Quellas nun han però diminui la valur da l'ouvra. A l'incuntrari – id ha dat ün purtret armonic e müravglius, dal qual i gniva discurri in tuot il reginom. E sch’els nu füssan morts, pitturessan els amo adüna ...