A1.25 Il rumantsch fa chambroclas

Legia il text. Sun las frasas güstas o fosas? 

Il rumantsch fa chambroclas

Pro'ls Rumantschs giò la Bassa fa il rumantsch magara chambroclas. Uschè m'ha meis cuafför rumantsch quintà tschel di ch'ün cumpatriot saja stat d'incuort a laschar tagliar ils chavels. Vuliond ch'el til taglia eir las survaschellas ha'l dit in buna fai: «Taglia'm amo las andschivas.» Il cuafför nu ha stübgià lönch ed ha respus al cliaint: «Lura stoust tü drivir la bocca.» Il cliaint ha guardà be tais ed ha dumandà, perche ch'el stopcha drivir la bocca per laschar tagliar las andschivas. Survaschellas ed andschivas sun pleds chi nu's douvra mincha di, impustüt giò la Bassa. 

Uschè s'ha il cuafför stuvü volver per nu laschar s'inaccordscher sia risada al cliaint. A mai ha'l lura dumandà a mia gronda surpraisa cha survaschellas saja bain Augenbrauen o brich, uschè vaiva eir el tschüf ün battibuogl. La risada es statta quista jada unanima e da quinderinvia til di eu adüna da tagliar amo las andschivas e driv lura la bocca. 
Id es bun cha nus Rumantschs discurrin rumantsch ün cun tschel, ma massa blers da nus as cuntaintan cun tudais-ch, quai chi fa chi s'invlida magara ün o tschel pled.  
 
A la dumonda, scha mia duonna ed eu discuorran rumantsch insembel, di eu pel solit: «Schi, cur cha no eschan sulets, o cur cha no discurrin sur dad oters.» Ma quai am tira adimmaint l'istorgia da mia mima chi vaiva quintà l'episoda da l'ovais-ch da Cuoira, Schmid da Grüneck, chi discurriva rumantsch. El d'eira stat invidà d'ün confrar ill'Africa dal Süd. Ils duos as vaivan reunits per ün past festiv in ün hotel a Johannesburg, ingio cha duos giuvens Lumnezians lavuraivan sco camariers. Ün da quels vaiva dit sü per tschel in rumantsch: «A quist gigant quia cul vainter gross dà lura be pac dessert.» Ils duos giuvens sun lura stats tuot schmorts, cur cha Monsignur ovais-ch tils ha ingrazchà in rumantsch per lur incletta bain maniada per seis problem principal dal pais. 

Dumeni Capeder, Lucerna