A1.28 25 pêra s-charpas l’on es tuot normal
Legia il text e fa l’ingiavinera da pleds cruschats.
25 pêra s-charpas l’on es tuot normal
Quai nu das-cha Eugen Cahenzli savair. Eu, Ludmilla Cahenzli, cumpr minch'on 25 pêra s-charpas. Ils peis da meis trais uffants creschan sul svelt.
Plüprobabel nu'm craja quai ingün. Ma d'incuort es meis mat gnü ed ha dit: «Mamma, mias s-charpas da gimnastica sun massa pitschnas.»
«Impussibel. No tillas vain bain be güsta cumpradas avant duos mais», di eu.
Ma meis mat insista: «Ellas fan mal.»
Eu am sgob e schmach cun ün daint ourasom sias s-charpas. Avant duos mais d'eira il polsch trais centimeters davent dal piz da la s-charpa. Eu'm regord amo bain cha la vendadra da s-charpas vaiva dit: «Quellas s-charpas sun bain massa grondas. Vos mat va uschè in schgniffas.»
Eu n'ha listess cumprà precis quellas s-charpas. Dürant tippar e pakettar aint las s-charpas ha la vendadra fat üna tschera sco sch'eu füss la mendra raffadra e maltrattess a meis uffant.
Uossa tuorness eu jent cul mat in butia e dschess a la vendadra: «Ch'Ella tocca üna jada e guarda, ingio cha'l polsch es! Che mâ dschess Ella?!» Ella nu'm crajess cha'l mat, chi implischa hoz las s-charpas, es quel chi vaiva avant duos mais sia dainta d'pè trais centimenters davent dals pizs da las s-charpas.
Mender co la vendadra es però Eugen Cahenzli. A meis hom nu das-cha dir ch'eu stopcha cumprar
s-charpas. El survain uschigliö ün'attacha. Eugen manaja ch'eu cumpra bler massa bleras s-charpas. Invezza nu sa'l gnanca da la mità da las s-charpas. Tschella mità cumpr eu nempe a la zoppada. Eugen bada bain vi da las finanzas cha alch nu tuorna, ed el dumonda minchatant: «Hast tü inglur ün conto, ingio cha tü mettas d'vart raps?» Ma eu respuond adüna cun ün'ögliada innozainta «Na, sgür na.» La vardà es cha'ls pliffers svanischan illas butias da s-charpas.
D'incuort n'haja fat üna jada üna glista. Eu n'ha dombrà quantas s-charpas ch'eu cumpr in media in ün on. Sco dit, i sun 25 pêra. Ils blers chi legian quista cifra squassaran uoss' il cheu e pensaran: «Quella Ludmilla Cahenzli sbatta cumplettamaing! Ella ha plü co facil la malatia da cumprar s-charpas.» Ma mincha mamma cun trais uffants sa precis cha 25 pêra s-charpas l'on nun es brichafat schmasürà. Dal rest: sch'eu vess la malatia da cumprar s-charpas, cumpress eu bain 30 pêra be per mai svessa. Ma eu cumpr be var traja pêra s-charpas per mai. Il rest es pels uffants.
PS: Eugen douvra be 0.2 pêra s-charpas l'on – dimena mincha tschinch ons ün pêra s-charpas nouvas. E perquai ch'el nu va svess a cumprar s-charpas, nun ha'l propa ingün' idea che cha s-charpas cuostan insomma hozindi. El craja fermamaing cha bunas s-charpas da chürom cuostan be var 50 francs.