A1.30 25 pèra calzers ad onn ei normal
Legia il text e e fai il legn da plaids.
25 pèra calzers ad onn ei normal
Quei astga Eugen Cahenzli buca saver. Jeu, Ludmilla Cahenzli, cumprel mintga onn 25 pèra calzers. Ils peis da mes treis affons creschan en in tempo narr.
Probabel negin che crei. Mo dacuort ei miu buob vegnius ed ha detg: «Mumma, mes calzers da gimnastica ein memia pigns.»
«Nunpusseivel. Nus vein gie cumprau els pér avon dus meins», ditgel jeu.
Mo miu buob insista: «Els fan mal.»
Jeu s'enclinel e smachel orasum ses calzers. Avon dus meins era il polisch treis centimeters naven dil péz dil calzer. Jeu seregordel aunc bein che la vendidra da calzers veva detg: «Quels calzers ein bia memia gronds. Vies buob va gie en venter aschia.»
Jeu hai tuttina cumprau exact quels calzers. Duront tippar e pachetar en ils calzers ha la vendidra fatg ina tschera sco sch'jeu fuss la mendra raffadra e sco sch'jeu maltractass miu affon a moda crudeivla.
Ussa turnass jeu bugen cun il buob en stizun e schess alla vendidra: «Tuchei ina gada e mirei, nua ch'il polisch ei! Tgei scheis ussa?!» Ella cartess buc a mi ch'il buob ch'empleina oz ils calzers ei il medem che veva avon dus meins sia detta-pei treis centimenters naven dil péz dils calzers.
Mender che la vendidra ei denton Eugen Cahenzli. A miu um astgel jeu buca dir ch'jeu stoi puspei cumprar calzers. El survegn schiglioc in'attacca. Eugen tratga ch'jeu cumpri bia memia bia calzers. Dasperas sa el gie gnanc dalla mesadad dils calzers. L'autra mesadad cumprel jeu el zuppau. Eugen senta zuar vid las finanzas ch'enzatgei constat buc, ed el damonda mintgaton: «Has ti enzanua in conto, nua che ti mettas dalla vart daners?» Mo jeu rispundel adina cun egls gross: «Na, segir buc.» La verdad ei ch'ils daners svaneschan ellas stizuns da calzers.
Dacuort hai jeu inaga fatg ina gliesta. Jeu hai quintau ora cons calzers ch'jeu cumprel en media enteifer in onn. Sco gia detg, igl ei 25 pèra. Ils biars che legian quella cefra scrolan ussa il tgau e tratgan: «Quella Ludmilla Cahenzli batta cumpletamein. Ella ha probabel la malsogna da cumprar calzers.» Mo mintga mumma cun treis affons sa exact che 25 calzers ad onn ei insumma buca stravagau. Dil reminent: sch'jeu vess la malsogna da cumprar calzers, cumprass jeu gie 30 pèra mo per memezza. Mo jeu cumprel mo circa trei pèra calzers per mei. Il rest ei pils affons.
PS: Eugen drova mo 0.2 pèra calzers ad onn – pia mintga tschun onns in pèr novs. E damai ch'el va buca sez a cumprar quels, ha el gnanc la minima idea tgei che calzers cuostan insumma ozildi. El crei fermamain che buns calzers da curom cuostien entuorn 50 francs.