A1.27 Il romontsch fa tgaubrochels

Legia il text. Ein las constataziuns correctas ni fallidas?

Il romontsch fa tgaubrochels

Tiels Romontschs giu la Bassa fa il lungatg romontsch magari tgaubrochels. Aschia ha miu frisunz romontsch raquintau a mi tschei di ch'in cumpatriot seigi staus a schar tagliar cavels buca ton daditg. Vulend ch'el tagli ad el las survintscheglias di el da buna fei: «Taglia a mi aunc las unschivas.» Il coiffeur, buca maufers, rispunda al client: «Lu stos ti arver la bucca.» Surstaus manegia il client, pertgei ch'el stoppi arver la bucca per schar tagliar las unschivas. Survintscheglias ed unschivas ein plaids ch'ins drova buca mintga di, cunzun giu la Bassa. 

Aschia ha il frisunz stuiu semenar per buca schar encorscher sia risada. A mei damonda el lu per mia gronda surpresa, schebein survintscheglias seigi bein Augenbrauen ni buc, ton fuva el era vegnius en scumbegl. La risada ei quella ga stada unanima e dacheudenvi ditgel jeu ad el dad aunc tagliar las unschivas ed arvel la bucca per tuttacass. 

Igl ei bien che nus Romontschs tschintschein in cun l'auter romontsch, mo memia biars da nus secuntentan cun tudestg, quei che lai emblidar els magari in ni l'auter plaid.  

Alla damonda, schebein mia dunna ed jeu tschontschien romontsch, hai jeu la disa da rispunder: «Gie, cura che nus essan persuls, ni cura che nus tschintschein sur dils auters.» Mo gliez fa endamen a mi la historia da mia madretscha che haveva raquintau l'episoda digl uestg da Cuera, Schmid da Grüneck, che tschintschava romontsch. El fuva staus envidaus d'in confrar ell'Africa dil Sid. Essend els serimnai tier in past festiv en in hotel a Johannesburg, nua che dus giuvens Lumnezians luvravan sco cameriers, haveva in dad els detg a tschel per romontsch: «A quei umeneri cheu cul venter gries dai lu mo pauc dessert.» Buca pauc surstai ein ils dus giuvens stai, cura che monsignur uestg ha engraziau ad els per romontsch per lur beinmanegiada capientscha per siu problem principal dalla peisa.