A1.31 Clar-blau e rosa

Legia il text e dai risposta allas damondas. Tgei constataziuns ein correctas, tgeininas ein fallidas.

Retg Richard il dudischavel era buc mo in regent perdert e gest, mobein era in pictur renomau. Cunquei ch'el haveva bugen siu pievel, dessignava el en emprema lingia carstgauns. Per quei duvrava el sulettamein las colurs ner ed alv. Naturalmein saveva el che la glieud era buca mo alva ni nera, il fascinont per el era da mischedar quellas duas colurs. Aschia creava el bials maletgs en tuns grischs che derasavan ellas stanzas da siu casti in'atmosfera da ruaus e segirezia. Il retg era dil tuttafatg cuntents cun sesez e cun sia ovra.

In di denton ha il retg riscau da dar in'egliada sur ils cunfins da siu reginavel ora ed ei s'inamuraus dalla princessa Liliana. Era ella era ina famusa pictura passiunada. Ses maletgs sedifferenziavan denton fetg da quels dil retg. Ella duvrava per sias ovras sulettamein colurs fermas e gaglias. Alv e ner, las colurs preferidas dil retg, muncavan ella paletta da colurs dalla princessa, mo ils maletgs dad ella plaschevan tuttina al retg. Era la princessa era fascinada dallas ovras dil retg, aschia ch'els han decidiu da scaffir in maletg communabel. Mo cul maletg hai dau nuot niev, perquei che la princessa deva colur alla vart seniastra dalla teila, duront ch'il retg creava la part dretga en siu stil vegl.

In onn pli tard han la princessa ed il retg survegniu ina feglia. Igl affon haveva grond plascher d'observar ses geniturs duront che lezs malegiavan. Cura ch'els eran in di naven, ha igl affon priu la colur alva dalla paletta da siu bab ed ha colurau cun quella il maletg che sia mumma haveva gest finiu. E mira cheu! Ord las fermas colurs cotschnas, blauas e verdas ha ei dau novas colurs clar-verdas, rosa e clar-blauas. Cura ch'ils geniturs han viu quei, eran els incantai da quels tuns da pastel ed han realisau che quei vegni ad esser el futur lur moda e maniera da crear in maletg communabel. Cul temps han las colurs clar-blauas e rosa schizun scatschau las colurs dall'entschatta.

Secapescha ch'ins ha buca saviu evitar ch'era singulas lingias crutschas fetschien part dil maletg. Quellas han denton buca diminuiu la valur dall'ovra. Il cuntrari ei stau il cass – igl ei daventau in maletg harmonic e spir bellezia, dil qual ins ha tschintschau egl entir reginavel. E sch'els fussen buca morts, malegiassen els aunc adina ...